Diallo ni umwe mu bakinnyi bakomeye ba United kuva Ruben Amorim yafataga inshingano mu Ugushyingo, amaze gutsinda ibitego bitatu mu mikino itandatu ishize, harimo n'igitego cyo kunganya mu mukino wo ku Cyumweru batsinzwe na Liverpool 2-2.

Uyu mukinnyi w'imyaka 22 ukomoka muri Cote d'Ivoire, umaze gukina imikino 50 agatsinda ibitego icyenda kuva yagera Old Trafford avuye muri Atalanta mu 2021, ubariyemo n’igihe yari mu ntizanyo muri Rangers na Sunderland.

"Ntewe ishema cyane no kuba nasinye amasezerano mashya. Nagize ibihe byiza cyane muri iyi kipe ariko kandi hari n'ibindi byinshi nshaka kugeraho mugihe kizaza ", Diallo aganirira ku rubuga rw’ikipe.

Yakomeje agira ati “Mfite intego zikomeye mu mupira w'amaguru kandi nifuza kwandika amateka muri Manchester United”.

Daillo aravuga ati, “Kuva aho ngereye hano mu myaka ine ishize, namenye ibintu byinshi. Ndashimira cyane abatoza n'abakozi bamfashije gutera imbere n'abafana badahwema kungaragariza ko banshyigikiye umunsi ku munsi”.

"Niteguye gutanga ibyo mfite byose kugira ngo mfashe iyi kipe kandi nongere ntume abakunzi bayo baterwa ishema nayo".

Jason Wilcox, umuyobozi mu bijyanye na tekinike muri Manchester United avuga ku mukinnyi Amad Diallo nyuma yuko yongereye amasezerano

Umuyobozi wa United Jason Wilcox yemeza ko Diallo azagira akamaro kanini muri iyi kipe.

Wilcox yagize ati "Buri wese yishimiye iterambere rya Amad - ubuhanga bwe ku mupira, ubuhanga n'ubushake bituma aba igice cy'ingenzi cy'ahazaza ha Manchester United".

Akomeza agira ati "Imyaka myiza cyane mu mwuga we iri imbere ye kandi twese dutegerezanyije amatsiko gufasha Amad kugera ku gasongero ke kanyuma no kugera ku ntsinzi muri iyi kipe mu bihe biri imbere".

Manchester United iri ku mwanya wa 13 muri Premier League n'intsinzi esheshatu mu mikino 20 ndetse ku Cyumweru izasura ikipe ya Arsenal mu mukino wo guhatanira itike y'icyiciro cya gatatu cya FA Cup.