Uyu mukinnyi usatira izamu anyuze iburyo, ufite izina  ry'akabyiniriro ka Boda Boda yahawe n'abafana, amaze gutsindira Villa SC ibitego bitanu muri Shampiyona ya Uganda igeze ku munsi wa 14.

Kiwanuka ni we kandi watsinze igitego cyafashije Uganda gusezerera u Burundi mu ijonjora rya kabiri cya CHAN 2024 mu mpera z’Ukuboza.

Umwe mu bayobozi ba APR FC yemereye ikinyamakuru IGIHE ko bamaze gusinyisha uyu mukinnyi wari usigaje umwaka n’igice, ahabwa amasezerano y’imyaka ibiri mu Ikipe y’Ingabo z’Igihugu.

Iyi kipe yambara umukara n’umweru ikomeje gushaka uko yakongeramo abandi bakinnyi muri iyi Mutarama kugira ngo izabe ikomeye mu mikino yo kwishyura ya Shampiyona.

Hakim Kiwanuka yageze muri Villla SC muri Nzeri 2023, avuye muri Proline FC ndete yigeze kujya mu igerageza i Burayi.

Mu mwaka w’imikino ushize, yafashije Jogoo nk’uko Villa SC bayita, kwegukana Igikombe cya Shampiyona, by’akarusho atsinda mu mukino wa nyuma iyi kipe yatsinzemo NEC ibitego 2-0.

Kiwanuka ni umwe mu bakinnyi batatu Villa SC yagenderagaho mu busatirizi, aho yafatanyaga na Patrick Jonah Kakande ndetse na Charles Lwanga bita Neymar.