Ni umukino wakinnwe kuri uyu wa Gatatu taliki ya 8 Mutarama 2025 Saa cyenda kuri Stade Umuganda mu karere ka Rubavu.

Ikipe ya APR FC yatangiye umukino ariyo ihererekanya umupira neza gusa kugera imbere y’izamu rya Marine bikomeza kuba ingorabahizi. 

Ku munota wa 13 iyi kipe bakunda kwita Nyamukandagira yabonye uburyo imbere y’izamu ku mupira Tuyisenge Arsene yarahaye Dushimirimana Olivier gusa ateye umupira uca ku ruhande rw’izamu gato.

Gusa na Marine yakomeje gucishamo yataka APR FC ndetse iza no kubona uburyo bwiza imbere y’izamu ku mupira mwiza waruzamukanywe na Suley Sanda, awuhindura kwa Mbonyumwami Taiba ashyiraho agatsinsino ariko birangira ba myugariro ba APR FC bawukuyeho bawushyira muri koroneri.

Hari aho Marine FC yashoboraga kubona penaliti ubwo Ndombe yari ategewe mu rjubuga rw’amahina gusa umusifuzi wo ku ruhande agaragaza ko hari habayeho kurarira.

Mbere yuko igice cya mbere kirangira amakipe yombi yakiniraga mu kibuga hagati gusa APR FC inyuzamo ikagerageza gusatira izamu rya Marine binyuze ku mukinnyi wabo Tuyisenge Arsene. Igice cya mbere cyaje kurangira amakipe yombi anganyije 0-0.

Igice cya kabiri cyatangiranye impinduka ku ruhande rw’ikipe ya Marine FC aho Twizerimana Mubarakh yasimbuye Ndombe

Ku  munota wa 49 Usabimana Olivier yatsinze igetego cya mbere cya Marine, ku mupira yarahawe nu’umukinnyi Twizerimana Mubarakh winjiye mu kibuga mu gice cya kabiri asimbuye.

Nyuma yo gutsindwa igitego APR FC yahise ikora impinduka igitaraganya Dushimirimana Olivier na Thadee Lwanga bava mu kibuga hajyamo Kwitonda Alain Bacca na Dauda Yussif.

Ku munota wa 59 Kwitonda Alain Bacca wari winjiye mu kibuga asimbuye yatsinze igitego cyo kwishyura ku ishoti riremereye yari arekuriye kure, riragenda riboneza mu nshundura. 

Nyuma yuko Nyamukandagira ibonye igitego cyo kwishyura yakomeje gusatira bikomeye ishaka igitego cy’insinzi gusa ba rutahizamu babo bikomeza kubangira.

Umukino ubura amasegonda make ngo urangire, ikipe ya APR FC yabonye igitego cya kabiri cyatsinzwe na Ruboneka Jean Bosco ku mupira muremure yarekuye umuzamu agerageza kuwukuramo ariko biranga.

Uyu mukino warangiye ikipe y’ingabo z’igihugu itahanye insinzi y’ibitego 2-1 mbere yuko ijya gukina n’Amagaju FC ku cyumweru mu mukino usoza igice kibanza cya shampiyona.

Uyu mukino kandi warebwe n’abakinnyi babiri bakomoka mu gihugu cya Uganda baheruka kugurwa n’iyi kipe y’ingabo z’igihugu aribo Denis Omedi na Hakim Kiwanuka.