Irushanwa rya CHAN rizaba ku nshuro ya munani, riteganyijwe kuva tariki ya 1 kugeza ku ya 28 Gashyantare 2025 mu bihugu bya Uganda, Tanzania na Kenya.

Ku wa Kabiri, tariki ya 7 Mutarama, ni bwo CAF yatangaje ko ikipe izaryegukana izahabwa miliyoni 3,5$.

CAF yatangaje kandi ko ibihembo byose bizatangwa muri iri rushanwa byiyongereyeho 32%, biba miliyoni 10,4$ (agera kuri miliyari 14,5 Frw).

Perezida w’iyi Mpuzamashyirahamwe ya Ruhago muri Afurika, Dr. Patrice Motsepe, yagize ati “CHAN ni irushanwa ry’ingenzi ku iterambere n’izamuka ry’abakinnyi bakina muri Afurika, ndetse n’impano z’abakinnyi bakiri bato ku buryo bakomeza guhangana mu mupira wacu no mu marushanwa ya CAF.”

Yongeyeho ko iri rushanwa riri muri gahunda za CAF zo gushora mu mupira wa Afurika kugira ngo ukurure abakunzi ba ruhago, abareba televiziyo, abaterankunga n’abafatanyabikorwa bo muri Afurika no hirya no hino ku Isi.

CAF ikomeje gushyira Amavubi mu rujijo

Ku wa Kabiri, CAF yongeye gutangaza ko ibihugu 17 byamaze kubona itike ari Kenya, Tanzania, Uganda, Maroc, Guinée, Sénégal, Mauritanie, Niger, Burkina Faso, Nigeria, Repubulika ya Centrafrique, Repubulika Iharanira Demokarasi ya Congo, Congo, Sudani, Zambia, Angola na Madagascar.

Yongeyeho ko “ibindi bihugu bibiri bizitabira muri CHAN ya Kenya, Tanzania na Uganda nyuma y’imikino y’amajonjora isigaye.”

Aha wakwibaza niba hari ikindi cyiciro cy’amajonjora CAF yaba iteganya gushyiraho mu gihe hasigaye ibyumweru bitatu gusa ngo irushanwa ritangire.

Kuva tariki ya 28 Ukuboza 2024, ubwo u Rwanda rwasezereraga Sudani y’Epfo hitabajwe igitego cyo hanze mu ijonjora rya kabiri ari na ryo rya nyuma, rukomeje gutegereza kumenya niba ruzakina iri rushanwa.

Umukino u Rwanda rwasezereyemo Sudan y'Epfo ku kunyuranyo cy'igitego cyo hanze

Kugeza ku wa Kabiri, ubuyobozi bw’Ishyirahamwe ry’Umupira w’Amaguru mu Rwanda (FERWAFA) bwabwiye IGIHE ko bugitegereje umwanzuro wa CAF ndetse bigoye gutangira imyiteguro yo gukina iri rushanwa ritarabwirwa niba Amavubi azarikina.

Ni mu gihe tombola ya CHAN 2024 izabera muri Kenya ku wa 15 Mutarama 2025, bivuze ko hasigaye icyumweru kimwe gusa.

Andi makuru avuga ko CAF yegereye Algérie mu ibanga, iyisaba kwitabira CHAN 2024 nubwo muri Nzeri iki gihugu cyari cyatangaje ko kitazakina iri rushanwa.

Impamvu ngo ni uko agace ko mu Majyaruguru ya Afurika (UNAF) kuri ubu kazaba gahagarariwe na Maroc gusa nyuma y’uko Misiri, Libya na Tunisie byanze gukina iri rushanwa.

CAF yabaye yifashe nyuma yo gusanga u Rwanda nirwemezwa, CECAFA izaba ifite amakipe atanu mu irushanwa, ni ukuvuga Uganda, Kenya, Tanzania, Sudani n’u Rwanda mu gihe UNIFFAC (Afurika yo Hagati), COSAFA (mu Majyepfo), na UFOA A na B (mu Burengerazuba) zose zizaba zifitemo amakipe atatu.

Iyi mpuzamashyirahamwe isanga kandi kugira Algérie mu irushanwa byifasha kurimenyekanisha muri Afurika y’Amajyaruguru.