Itangazo rya Vatikani rivuga ko Papa "yaruhutse ijoro ryose" kandi ko nta muriro afite. Ubuvuzi bwe bwahinduwe gato hashingiwe ku bindi "byanonosowe mu binyabuzima", nk'uko itangazo ribigaragaza.

Vatikani yongeyeho iti "kugira ngo yorohereze gukira kwe, abaganga bamwandikiye ko agomba kuruhuka byuzuye; ku bw'ibyo rero, ejo ku Cyumweru, tariki ya 16 Gashyantare, Papa Mutagatifu ntazongera kuyobora isengesho rya Angelus; nyamara, afite umugambi wo kohereza iyo nyandiko kugira ngo isohoke".

Ku wa Gatanu, Papa yajyanywe mu bitaro "kugira ngo bamupime" kandi bakomeze kumuvura indwara y'ibihaha, nk'uko Vatikani yabivuze.

Ibinyamakuru byo mu Butaliyani byatangaje ko ibizamini byo kwa muganga byitezwe gukomeza mu mpera z'icyumweru.

Vatikani yongeyeho iti "Papa Francis yamenyeshejwe ubutumwa bwinshi bwo kumushimira no kumugaragariza ko bamukunda, kandi agaragaza ko ashimira, ndetse asaba ko amasengesho akomeza".

Dukurikije uko ikigo cy'itangazamakuru cyo mu Butaliyani cyitwa ANSA kibivuga, "inkuru zituruka i Vatikani nyinshi" zavuze mbere y'aho ko papa yamaze "ijoro ritekanye", ibyo bikaba "bihuje n'imimerere yari arimo ejo igihe yajyanwaga mu bitaro by'i Gemelli i Roma".

Raporo zose zerekeye ubuzima bwa Papa ziteye icyizere, zigaragaza ko umuriro we wagabanutse kuva yajyanwa mu bitaro, nk'uko ANSA yabitangaje.

ANSA kandi yatangaje ko "amasoko atandukanye" yahishuye ko Papa yageze ku wa Gatanu i Gemelli ananiwe cyane bitewe n'ibibazo byo guhumeka bifitanye isano n'umwanda mwinshi kandi ko ubuvuzi yari arimo akorerwa mu rugo butatanze umusaruro witezwe.

Ariko kandi, hari icyizere muri Vatican ku bijyanye n'ubuvuzi bushya bwatangijwe ejo nyuma y'ibizamini, byagaragaje ko Papa yari arwaye indwara yo mu myanya y'ubuhumekero, nk'uko ANSA ibivuga.

Umuvugizi w'Icyicaro Cyera Matteo Bruni yaganiriye n'abanyamakuru mu cyumba cy'abanyamakuru ku wa Gatandatu maze avuga ko Papa Francis "afata ifunguro rya mu gitondo agasoma ibinyamakuru bimwe na bimwe". Yongeyeho kandi ko "ibizamini n'imiti yo kuvura" bikomeje gukorwa.