Ni imikino yakinwe ku itariki ya 4 Mutarama Saa cyenda. Kuri Stade Ubworoherane ikipe ya Musanze FC yari yakiriye ikipe ya APR FC.

Uyu mukino watangiye APR FC iri hejuru cyane ikina isatira, aho byanashobokaga ko kumunota wa 14 w'umukino umukinnyi Tutisenge Arsene yari gutsinda igitego ubwo yaramaze gucenga ba myugariro b'ikipe ya Musanze gusa ateye ishoti umupira unyura hejuru y'izamu gato.

uko iminota yagendaga yicuma amakipe yatangiye kunganya imbaraga ndetse umukino utangira gukinirwa mu kibuga hagati.

Igice cya mbere cy'umukino cyarangiye amakipe yombi anganya 0-0.

Igice cya kabiri cyatangiranye n'impinduka 2 ku ruhande rwa APR FC havamo Ramadhan Niyibizi na Ndayishimiye Dieudonne hajyamo Taddeo Lwanga na Nshimiyimana Yunusu. APR FC yakomeje gusatira  ndetse ku munota wa 73' ibona penaliti ku mupira waruvuye muri koroneri yari itewe na Ruboneka Jean Bosco maze myugariro wa Musanze FC awukozaho intoki.

Abakinnyi ba Musanze FC babanje kwanga ko iyi penaliti iterwa bijyanye nuko bavugaga ko atariyo, gusa biza kurangira itewe neza na Mugisha Gilbert mu nshundura igitego cya mbere cya APR FC kiba kirabonetse.

Mbere yuko umukino urangira ikipe ya Musanze FC yatatse bikomeye ikipe ya APR FC ishaka igitego cyo kwishyura, gusa biza kurangira kitabonetse APR FC iba yegukanye amanota atatu y'ingenzi ayifasha gukomeza kwiruka inyuma ya mukeba wayo Rayon Sport.

Undi mukino wabaye uyu munsi ku isaha ya Saa cyenda kuri stade Kigali pele wahuje ikipe ya AS Kigali n'ikipe ya Gasogi United, biza kurangira AS Kigali itsinze Gasogi United 2-1. APR FC ijya ku mwanya wa 2 n'amanota 28 mu gihe AS Kigali yo yagiye ku mwanya wa 3 n'amanota 26.