Umusore witwa Jean Pierre Ubarijoro alias Dragon uri mu kigero cy’imyaka 30 yari mu rukiko rukuru urugereko rwa Nyanza ari hagati y’abanyamategeko be babiri.

Ari kuburana ubujurire ku gihano yakatiwe n’Urukiko rwisumbuye rwa Huye cya burundu cyo gusambanya abana babiri.

Abo bana bombi bava indi imwe, umwe afite imyaka ine undi akagira imyaka itanu bose bigaga mu kibura mwaka(Gardienne).

Ubarijoro alias Dragon kimwe n’abanyamategeko be baraburana bashingiye kuri raporo ya muganga kimwe n’ibyo bavuga ko abatangabuhamya bamushinja ubuhamya bwabo burimo gutera urujijo.

Abanyamategeko ba Ubarijoro bavuze ko raporo ya muganga yagaragaje ko aba bana nta bikomere bari bafite mu gitsina nyamara abashinja umukiriya wabo bo baravuze ko abana mu bihe bitandukanye yajyaga abasambanya bavuye ku ishuri kuko banyuraga mu isantere aho Ubarijoro alias Dragon yabaga.

Ikindi uruhande rwajuriye ruravuga ko iwabo wabo bana bagiye kurega Ubarijoro alias Dragon kuko bari bafitanye amakimbirane naho Ubarijoro yakoraga.

Urukiko Rwisumbuye rwa Huye rumuhanisha igihano cy’igifungo cya burundu rwashingiye ku buhamya bw’abana bo ubwabo bivugiye ko yabasambanyije mu bihe bitandukanye ndetse bakabihuza n’imvugo z’abatangabuhamya.