Gikundiro yinjiye mu mukino idafite myugariro Aimable Nsabimana utari gukina kubera yishyuza amafaranga ya recruitment bamusigayemo. Bagize kandi ikibazo gikomeye ubwo kapiteni wabo Kevin Muhire yavaga mu kibuga nyuma y'igice cy'isaha nyuma y'igice cya mbere kubera imvune.

Muhire yakomeretse ku munota wa 14 nyuma yo kugongana na David Chemezie. Yamaze hafi iminota itanu hanze y'ikibuga bamuvura ngo barebe ko yagaruka mu kibuga. Ariko byaje kurangira asimbuwe na Hadji Iraguha nyuma yuko uyu mukinnyi wo hagati yasaga n'ubabaye cyane ku buryo adashobora gukomeza gukina.

Umusifuzi Samuel Uwikunda yahaye Ngagne ikarita y’umuhondo ku munota wa 30 kubera kwigwisha nyuma yo kugirana contact yoroheje na myugariro wa Police FC witwa Issah Yakubu.

Ku munota wa 44 rutahizamu ukomoka muri Senegal uzwiho gutsinda ibitego yaje guhindura umupira imbere y’izamu maze myugariro Youssou Diagne awutereka mu rushundura adahagaritse. Iki gitego cyatumye abakinnyi b'ikipe bagira morare ndetse n’abakunzi bayo batangira kuririmba bagira bati “ iyeeeee eeehh Murera”. 

Igice cya mbere cyarangiye Rayon iri imbere 1-0.

Umutoza w'ikipe ya Police FC, Vincent Mashami yatangiranye impinduka mu gice cya kabiri Didier Mugisha yinjira mu kibuga asimbuye Muhadjiri Hakizimana wari wagize umusaruro nkene mugice cya mbere mu gihe Simeon Iradukunda na we yasimbuye Eric Nsabimana.

Ku ikosa Yakubu yakoze ananirwa kugumana umupira, Fall ngagne yahise awifatira awushyira mu ruhunde rw’iburyo aho wasanze Bagayogo nawe wahise atera cross imbere y’izamu ukora kuri myugariro wa Police FC Shami Carnot uhita uboneza mu izamu. Rayon Sport ku munota wa 64 ikomeza kuyobora umukino ku 2-0.

David Chemezie wa Police FC yabonye ikarita itukura ku munota wa 88 nyuma y'ikosa rya kabiri yakoreye Aziz Bassane ubwo yari mu nzira asatira izamu, ikosa ryaje guhanwa na Abdul Rahman Rukundo gusa ntacyavuyemo.

Rayon yasoje umukino itsinze ibitego 2-0, ikomeza agahigo kabo ko kudatsindwa mu mikino y’igice cya mbere cya shampiyona. Gutsinda byatumye bakomeza kuyobora n’amanota 36, aho barusha amanota 8 APR FC nubwo yo igifite umukino umwe w’ikirarane.