Imikino ibanza ya Shampiyona y’icyiciro cya mbere 2024-2025, yashyizweho akadomo tariki 12 Mutarama 2025, ubwo ikipe y’Amagaju yatunguraga benshi itsinda APR FC igitego 1-0 kuri Stade Mpuzamahanga ya Huye.

Nyuma y’uyu mukino, ni byinshi byavuzwe ku ikipe y’Amagaju n’ingengo y’imari ikoresha, aho byatumye IGIHE ikora ubushakashatsi ku mishahara amakipe yo mu cyiciro cya mbere atanga, ni ko gusanga ayo APR FC ihemba buri kwezi, akubye kabiri ingengo y’imari y’Amagaju mu mwaka wose.

Menya buri kipe n'ingengo y'imari 

1. 16. Amagaju FC- 7 300 000 Frw

Amagaju y’Umutware Rutaremera, ni yo ari ku ndiba y’amakipe ahemba amafaranga menshi mu Rwanda, aho ku ngengo y’imari ya Miliyoni 100 zonyine, iyi kipe buri kwezi yishyura 7 300 000 Frw, ariko kugeza ubu ni yo yonyine yashoboye kurangiza imikino ibanza idatsinzwe na APR FC cyangwa Rayon Sports.

Iyi kipe mu mikino ibanza yayirangije iri ku mwanya wa munani n’amanota 21.

15. Vision FC-11 500 000 Frw

Vision FC nshya mu cyiciro cya mbere, kuri ubu iri kurwana no kutamanuka mu cyiciro cya kabiri aho iza ku mwanya wa 15 n’amanota 12 gusa ikarushwa inota rimwe gusa na Muhazi ya nyuma mu zidashobora kumanuka.

Imibare y’imikino ibanza yerekanaga ko yishyuraga Miliyoni 11,5Frw buri kwezi. Aho aya biteganyijwe ko aziyongera mu mikino yo kwishyura kubera abongewemo.

15. Etincelles FC -11 500 000 Frw

Etincelles ihora itaka ubukene, na yo yishyura izo miliyoni z’imishahara buri kwezi, aho ahanini azamurwa nuko ari imwe mu makipe make yishyurira abakinnyi bayo umusoro ku mushahara, TPR, kubera ko aya mafaranga atangwa n’akarere ka Rubavu.

Iyi kipe ikaba ari imwe muri eshatu zahinduye ubuyobozi muri uyu mwaka wa Shampiyona.

13. Musanze FC- 14 000 000 Frw

Musanze ni yo iza ku mwanya wa 13 mu guhemba menshi mu Rwanda. Iyi kipe yo mu majyaruguru, itanga Miliyoni 14Frw buri kwezi. Musanze umwaka ushize yari yatunguye benshi aho yari ku mwanya wa gatatu nk’iki gihe, gusa uyu mwaka yasubiye inyuma dore ko yarangije imikino ibanza ku mwanya wa 11.

13. Muhazi FC-14 000 000 Frw

Ikipe y’uturere twa Rwamagana na Kayonza, Muhazi FC na yo yishyura abakinnyi n’abatoza bayo miliyoni 14 Frw uko ukwezi kurangiye.

11. Mukura VS- 14 500 000 Frw

ku mwanya wa 11 haza ikipe ya Mukura VS. Yo abakozi bayo buri kwezi ibaha Miliyoni 14,5 Frw, ikaba ari imwe mu makipe na yo ashobora kuzamura aya mafaranga mu mikino yo kwishyura kubera amaraso mashya yongeyemo.

10. Gasogi United-15 000 000 Frw

Gasogi United ni yo ifite umwanya wa 10 mu guhemba neza mu Rwanda. Iyi kipe y’Urubabyingwe na Hommes et Femmes Integres, abakozi bayo ibishyura Miliyoni 15 Frw buri kwezi.

9. Rutsiro FC 16 000 000 Frw

Rutsiro na yo nshya muri Shampiyona, iri ku mwanya wa cyenda, aho iyi kipe itanga Miliyoni 16 Frw buri kwezi, harimo Miliyoni 2 Frw zihabwa umutoza Gatera Mussa.

Rutsiro kuri ubu iri ku mwanya wa gatanu n’amanota 21 nyuma y’imikino 15. Iyi na yo ikaba yariyubatse mu mikino yo kwishyura bivuze ko aya mafaranga ashobora no kuzamuka kurushaho.

8. Kiyovu Sports- 18 000 000 Frw

Kiyovu Sports yarangije imikino ibanza ari iya nyuma. Ihemba Miliyoni 18 Frw buri kwezi, Gusa aya akaba ateganyijwe kuzagabanuka mu mikino yo kwishyura kubera abakinnyi benshi batandukanye na yo bagasesa amasezerano.

8. Bugesera FC- 18 000 000 Frw

Bugesera FC buri mwaka ikunda kuba irwana no kutamanuka, ndetse n’ubu iri ku mwanya wa 10 ariko ikarusha Vision FC ya 15 amanota ane.

Kuva hambere, Bugesera izwiho kuba imwe mu makipe y’uturere ahemba neza, aho yanaciyemo bamwe mu batoza bakomeye. Muri uyu mwaka, iyi kipe itanga Miliyoni 18 Frw, yishyura abakozi bayo buri kwezi.

6. FC Marines- 19 000 000 Frw

FC Marines mu myaka ibiri ishize yazaga ku mwanya wa nyuma mu guhemba mu Rwanda, ariko ubu ni iya gatandatu mu zitanga agatubutse.

Iyi kipe y’Ingabo zirwanira mu mazi, ku kwezi yishyura agera kuri Miliyoni 19 Frw, iha abakinnyi n’abatoza bayo, harimo Miliyoni 4 Frw zihabwa umutoza Yves Rwasamanzi.

Amafaranga ya Marines na yo akaba yarazamuwe n’imisoro yishyurirwa abakinnyi bayo ndetse no kuba na yo yaragarutse muri politike yo gukinisha abanyamahanga.

5. As Kigali-19 500 000 Frw

Abanyamujyi ba As Kigali nk’abahagarariye umurwa mukuru w’u Rwanda, buri kwezi bishyura miliyoni 19,5 Frw nk’imishahara y’abakozi bayo.

Iyi kipe intego yayo kuri ubu ni igikombe cy’Amahoro, dore ko muri Shampiyona iza ku mwanya wa gatatu, aho irushwa amanota 10 na Rayon Sports ya mbere.

Abakinnyi bongewemo muri Mutarama na bo bashobora gutuma imishahara izamuka.

4. Gorilla FC- 20 730 000 Frw

Ku mwanya wa Kane ku makipe atanga agatubutse mu Rwanda, hari ikipe ya Gorilla FC.

Iyi kipe y’umunyemari Hadji YussuF Mudaheranwa, buri kwezi itanga umushahara wa Miliyoni 20,73 Frw ku bakinnyi n’abatoza bayo. Nyuma yo gusinyisha abarimo Nsanzimfura Keddy, byitezwe ko aya mafaranga azazamuka.

3. Rayon Sports- 44 000 000 Frw

Rayon Sports, ni yo iza ku mwanya wa gatatu mu gutanga menshi muri Shampiyona y’u Rwanda iyoboye magingo aya.

Iyi kipe yambara ubururu ’umweru, imishahara yayo kuri ubu igeze kuri Miliyoni 44 Frw, aho umutoza Robertinho n’abamwungirije bafatamo agera kuri Miliyoni 8 Frw.

Iyi kipe ariko yariyubatse aho ibikonyozi yaguze bishobora gutuma igera ku mwanya wa kabiri mu guhemba neza.

2. Police FC- 50 000 000 Frw

Ikipe y’abashinzwe umutekano ni imwe mu zikunzwe n’abafana bake muri Rwanda Premier league, gusa ntibiyibuza gushora.

Umutoza Mashami Vincent ahabwa icya 10 cy’amafaranga iyi kipe ihemba ku kwezi aho ahembwa miliyoni 5 Frw.

1. APR FC 200 000 000 Frw

APR FC, buri kwezi itanga arenga gato Miliyoni 200 Frw mu mishahara. Iyi na yo yishyurira abakinnyi imisoro.

Abatoza b’iyi kipe bagabana ibihumbi 45$ buri kwezi, mu gihe abakinnyi nka Lamine Bah na Ouatara mushya bahembwa 6000$ buri kwezi, buri umwe.

Muri iyi kipe abakinnyi barenga 10 barenza Miliyoni 5 Frw.