Umugenzuzi w’iperereza Titus Phiri yatawe muri yombi nyuma yo kurekura abakekwaho gukora ibyaha bari bafungiye kuri sitasiyo ya polisi ya Leonard Cheelo mu murwa mukuru, Lusaka, mbere yo guhunga wenyine.

Abari bafunzwe uko ari 13 bashinjwaga ibyaha nko kwiba, gukubita no gukomeretsa. Bose kuri ubu bahise bahunga bakimara gufungurwa n'uwo mupolisi wari wizihiwe na ka manyinya ndetse hashyizweho gahunda yo kubashakisha kugira ngo bagarurwe bashyikirizwe inzego z'ubutabera.

Umupolisi Titus Phiri ufunzwe azira kurekura imfungwa 13

Umuvugizi wa polisi, Rae Hamoonga, yavuze ko Bwana Phiri kw'ijoro ryo ku bunani ubwo yari yasinze yafashe imfunguzo za mugenzi ku ngufu azihaye.

Yagize ati “Nyuma y'ibyo, umugenzuzi w'iperereza Phiri yafunguye aho izo mfungwa zivanzemo abagore n'abagabo maze azitegeka kuva aho zikagenda, azibwira ko nazo zifite uburenganzira bwo kugenda nazo zikizihiza zikaryoherwa n'ubunani”.

Mu bantu 15 bakekwagaho ibyaha bafunzwe, 13 barahunze. Nyuma yo kurekura abari bafunzwe, uwo mupolisi nawe yahise ahunga gusa aza gufatwa. Bwana Phiri ntaravuga kuri ibyo birego.

Uwahoze ari umuvugizi w'umukuru w'igihugu akaba n'umunyamategeko Dickson Jere yanditse kuri Facebook ati: "Nkomeza guseka buri gihe iyo ntekereje uko byagenze - birasekeje! Ariko nyuma yaho nibutse ibyabaye mu mwaka wa 1997".

Mu ijoro ryo ku munsi wa mbere w'umwaka mushya wa 1997, umucamanza w'Urukiko rw'Ikirenga Kabazo Chanda watumye havuka impaka nyinshi, yategetse ko hafungurwa abantu 53 bakekwaga, bamwe muri bo bakaba barakekagwaho ibikorwa by'ubugizi bwa nabi na polisi y'icyi gihugu.

Bwana Chanda yarakajwe n'uko abakekwagaho ibyaha bari barafashwe mu 1992, ariko bakaba bataragezwa imbere y'urukiko.

Yagize ati "ubutabera butinda, n'ubundi ntibuba buhari". Niko gufata icyemezo nawe arabarekura ngo bajye kuryoherwa n'ubunani bwo muw'1997

Dukurikire ku mbuga nkoranyambaga dukoresha cg uduhe igitekerezo